Mesa Redonda: Financiamento de Proxectos emprendedores

Imprimir PDF

Itinerario: Financiamento

Resumo: Cristina Quintela fixo un breve repaso das liñas de financiamento a Pymes que ofrece o Igape (en colaboración coa Sociedade de Garantía Recíproca Sogarpo);

  • Financiamento de capital circulante; préstamo ou crédito a pymes por importe mínimo de 3.000€ e máximo de 600.000€, e con prazo de amortización máximo de 3 anos (aínda que na modalidade de póliza de crédito, a subvención limitarase ao primeiro ano). O tipo de interese dependerá de se existe un aval concedido por Sogarpo (Euribor seis meses máis 1,50 puntos) ou non hai aval previo (Euribor seis meses máis 2 puntos); a subvención alcanzará os 1,50 puntos no primeiro caso, e dous puntos no segundo, polo que o tipo de interese final será únicamente Euribor seis meses. O IGAPE subvenciona, ademais, a comisión anual do 1% que SOGARPO cobra polo seu aval.
  • Financiamento reestructuración de pasivos; préstamo a sociedades mercantís ou cooperativas por importe mínimo de 25.000€ e máximo de 1.000.000€. Non hai prazo máximo para a amortización, pero a subvención calcularase para un préstamo teórico a 7 anos. O tipo de interese dependerá de se existe un aval concedido por Sogarpo (Euribor seis meses máis 1,50 puntos) ou non hai aval previo (Euribor seis meses máis 2 puntos); a subvención alcanzará os 1,50 puntos no primeiro caso, e dous puntos no segundo, polo que o tipo de interese final será únicamente Euribor seis meses. O IGAPE subvenciona, ademais, a comisión anual do 1% que SOGARPO cobra polo seu aval.
  • Financiamento de ampliación de capital; préstamo ou crédito a socios actuais ou futuros de pymes xa constituídas, co fin de obter fondos con destino exclusivo á toma de participacións en ampliacións de capital, por importe mínimo de 3.000€ (por cada socio solicitante) e máximo de 600.000€ (por empresa que opta pola ampliación de capital). Non hai prazo máximo para a amortización, pero a subvención calcularase para un préstamo teórico a 7 anos. Do mesmo xeito que nos dous casos anteriores, o tipo de interese dependerá de se existe un aval concedido por Sogarpo (Euribor seis meses máis 1,50 puntos) ou non hai aval previo (Euribor seis meses máis 2 puntos); a subvención alcanzará os 1,50 puntos no primeiro caso, e dous puntos no segundo, polo que o tipo de interese final será únicamente Euribor seis meses. O IGAPE subvenciona, ademais, a comisión anual do 1% que SOGARPO cobra polo seu aval.

Jorge Sales, Director de Operacións de Sogarpo, realizou unha presentación desta sociedade de garantía recíproca, e das vantaxes que ofrece ás pymes para o seu financiamento cando estas atopan dificultades de acceso ao mercado de capitais ou insuficiencia de garantías, e especialmente, cando hai carencia de información e asesoramento. Sogarpo, como xa se manifestou na presentación anterior, avala a pymes, sociedades mercantís e cooperativas, facilitando aos seus socios, melloras dos tipos de interese, financiamento a longo prazo e asesoramiento adecuado ás súas necesidades. O papel fundamental desta sociedade, é a de negociar coas entidades de crédito o prezo e prazo obtendo mellor custo financeiro en fianzas e outros avales.

Outra das SGR presentes na mesa, Afigal, realizou -a través do seu Director Comercial, Gonzalo González- unha exposición sobre as súas actividades e vantaxes de formar parte como socio da mesma. Afigal presta os seus servizos a máis de 13.000 empresarios das 4 provincias galegas, aos que ofrece avales técnicos, especiais e financeiros. Centrou a súa exposición no modelo de emprendedor diferenciando cinco fases para a creación e posta en funcionamento dun novo negocio; predisposición, proxección, procura de apoios, posta en marcha e desenvolvemento do proxecto. Todo emprendedor debe ademais ter en conta e analizar o medio local e contorna social no que levará a cabo a súa actividade e o mercado/situación económica do mesmo. Para Gonzalo González o perfil do emprendedor de éxito é o dun traballador por conta allea, cunha experiencia mínima en distintos postos de traballo de tres a cinco anos, que decide crear unha nova empresa e que coñece o ámbito de mercado onde comezará a súa actividade e ten a capacidade económica suficiente para iniciar o seu andaina profesional.

María Fernández de REDE BANG realizou unha breve disertación sobre os Business Angels Network Galicia que se traduce en Inversores que buscan un proxecto no cal investir o seu diñeiro, coñecementos e contactos. A selección dos proxectos a financiar para dirixilos aos B.A. realízase mediante a confrontación dos perfís tipo, por iso é moi importante ser o máis preciso posible á hora de cubrir os cuestionarios. Rede Bang ofrece a emprendedores asesoría na realización do Plan de Empresa, análise e validación do seu proxecto empresarial e a difusión do seu perfil con absoluta confidencialidade (ao non incluír datos persoais do novo promotor) no boletín electrónico que recibe o inversor.

O proceso de achegamento entre Business Angels e emprendedores, lévase a cabo a través da circulación dos plans de negocios entre inversores e a realización de foros de investimento onde os emprendedores presentan as súas propostas a un reducido número de inversores que expresaron o seu interese no plan de negocios. O perfil dos B.A. é o dun home de entre 40-65 anos, que inviste ata 2 millóns de € en sectores con potencia de crecemento (pero sobre todo apostan por xente con ideas, talento e capacidade de xestión ), con experiencia en finanzas, xerencia, marketing, vendas, coñecementos técnicos, ferramentas de xestión.

As claves para que o proxecto emprendedor obteña o financiamento empresarial necesaria pasan por elaborar un bo plan de negocios, obter información sobre os diferentes instrumentos de financiamento, saber vender o proxecto empresarial e non depender de subvencións como financiamento principal do mesmo.

Juan Carlos Carneiro, Director Territorial de Caixa Galicia, subliñou as vantaxes que ofrece esta entidade financeira á hora de financiar un proxecto emprendedor, así como un repaso á situación actual do mercado financeiro e aos produtos financeiros postos a disposición dos emprendedores.

Horario:  10.30 - 11.15

Moderador: Cristina Quintela, Directora Area Financiamento do IGAPE

Ponentes:

Descargar presentación Jorge Juan Sales Illán