Proyecto GEM. Premio EMPRENDEDORXXI 2009

Itinerario: Oportunidades de negocio II

Resumo:   Na súa exposición, Araceli de Lucas fixo un percorrido polo significado do proxecto GEM e os obxectivos do mesmo; trátase dun Observatorio Global da Actividade Emprendedora que analiza e mide a capacidade emprendedora ao longo do ano, para o fomento de actuacións que melloren a capacidade produtiva destas novas iniciativas. Neste sentido, suscítase un modelo de análise baseada no estudo das condicións xerais da contorna do emprendedor e dos condicionantes no ámbito nacional, empregando como fontes informativas, enquisas a poboación adulta e sondeos entre expertos, ademais doutras variables secundarias.

Así mesmo, esta ponente reflexionou sobre o perfil do emprendedor actual; a grandes liñas, na maioría dos casos trátase dun varón (58% dos supostos), cunha media de idade de 38 anos, que reside en zonas urbanas, de orixe española, que só nun 11% dos casos manifesta ter experiencia previa, e cuxa motivación principal é a oportunidade que se lle presenta para crear un novo negocio.

Respecto ao perfil das novas iniciativas emprendedoras, un 42% dos casos son servizos destinados ao consumo, cun único propietario, con alta percepción da súa contorna competitiva e capacidade innovadora reducida e que, no 48% dos casos, financia a súa actividade con recursos propios.

 Dentro desta exposición, levouse a cabo a presentación do premio EMPRENDEDORXXI 2009, proposto pola CEG e La Caixa, na que tomaron parte Rafael Serrano Hernández, Técnico CEG e Francisco Javier Rodríguez Enríquez, Responsable de Institucións de La Caixa.

Ponentes: Araceli de Lucas Sanz, Directora do Proyecto GEM Galicia